Euskal Fondoko zuzendaria, Juanma Balerdi, azaroaren 12an izan da, “Nekazaritza-elikadura lankidetzaren eredu berriak garapenerako, krisi geopolitikoaren testuinguruan” izeneko Nazioarteko Sinposioan. Ekitaldia Zaragozako Mediterraneoko Nekazaritza Institutuak (CIHEAM Zaragoza) antolatu du,  Nazioarteko Lankidetzarako Espainiako Agentziaren (AECID) babesarekin.

Topaketa azaroaren 11n eta 12an  izan da CIHEAM Zaragozaren egoitzan, baita online ere, eta lankidetzarako europar agentzietako adituak, NBEko eta nazioarteko erakundeetako ordezkariak, GGKEetako kideak, akademikoak eta tokiko zein eskualdeko gobernuetako arduradunak bildu ditu, nekazaritza-elikaduraren arloko lankidetzaren norabide berriak aztertzeko.

Balerdik Sinposioko VI. Mahai-saioan parte hartu du, lurralde-ikuspegitik lankidetza deszentralizatuaren eredua aztertzeko. Saio horretan autonomia-erkidegoek lankidetzari egiten dioten ekarpena, lankidetzarako funtsen eginkizuna eta eskualde-mailako koordinazio-ereduak jorratu dira.

Bere mintzaldian, Euskal Fondoak bere esperientzia aurkeztu zuen, koordinaziorako tresna eta nazioarteko lankidetza kudeatzeko udal oinarriko tresna gisa. Hala, funtsak lankidetza deszentralizaturako tresna eraginkorrak direla eta euskal elkartasunaren artikulazio instituzionalean erreferente direla indartu zen.

• Informazio gehiago: https://www.iamz.ciheam.org/es/