Gaztenpatiak hamar urte bete ditu eta, urteurren hori dela eta, Euskal Herriko Unibertsitateak (EHU) eta Euskal Fondoak Kulturarteko Topaketaren edizio berri bat antolatu dute. Lankidetza-proiektuak ezagutzeko, esperientziak partekatzeko eta unibertsitatearen eta erakunde bazkideen arteko lankidetza sendotzen jarraitzeko gunea izango da. Topaketak nazioarteko erakunde bazkideen ordezkarien parte-hartzea ere izango du.

Hiru jardunalditan zehar, topaketak Gaztenpatia proiektuetara hurbiltzeko, horietan parte hartu dutenen esperientziak ezagutzeko eta unibertsitate-komunitatearekin batera azken hamar urteetako ibilbidearen inguruan hausnartzeko aukera emango du.

• Urriaren 5ean, astelehenean, topaketa Gasteizen hasiko da. Ikasleei zuzendutako jardunaldian, 2026/27 ikasturterako aurreikusitako Gaztenpatia proiektuak aurkeztuko dira eta aurreko parte-hartzaileen esperientziak partekatuko dira.

• Urriaren 6an, asteartean, Bilboko Bizkaia Aretoan jarraituko du, «Gaztenpatia birpentsatzen» mintegi-tailerrarekin. Aurreko edizioaren esperientzia aztertzeko, ikaskuntzak eta jardunbide egokiak partekatzeko eta programaren etorkizunari begirako proposamenak egiteko gunea izango da.

Hamar urte Gaztenpatiarekin

• Urriaren 7an, asteazkenean, Donostiako Aieteko Jauregiak Gaztenpatiaren hamargarren urteurrena dela eta egingo den ekitaldi instituzionala hartuko du. Topaketa 09:30etatik 11:30era izango da, eta EHUren eta Euskal Fondoaren arteko lankidetzaren ibilbidea berrikusteko eta programaren jarraipena aztertzeko aukera emango du.

Jardunaldian Gaztenpatia Manifestuaren irakurketa egingo dute Joxerramon Bengoetxeak, EHUko errektoreak, eta Nati López de Munain Alzolak, Euskal Fondoaren presidenteak.

Testuinguru horretan, Euskal Fondoak erakunde bazkideak ere urteurreneko ekitaldira gonbidatzen ditu, hamar urteko lankidetza- eta ikaskuntza-ibilbide hau elkarrekin ospatu eta aitortzeko.

• Informazio gehiago eta izen-ematea